ആരായിരുന്നു ഞാൻ നിനക്ക്?…..

ചാന്ദ്രകിരണങ്ങൾ നാഗങ്ങളെപ്പോലെ വരിഞ്ഞുമുറുക്കിയ രാവിൽ,

ജാലകത്തിന്റെ ഓരം പറ്റി പതിയെ എന്നെയുപേക്ഷിച്ച് ഓടിയകലാൻ ശ്രമിച്ച നിന്നോട് ;ഞാൻ ചോദിച്ചതോർക്കുന്നുവോ ബാദുഷാ, “ഞാൻ നിനക്കാരായിരുന്നുവെന്ന്? ”

മൗനമായിരുന്നു അന്നുനിന്നുത്തരം.

മൗനത്താൽ തീർത്ത ആകാശഗോപുരത്തിലെ ആരുമറിയാത്ത രാജാവായിരുന്നില്ലേ നീ?

എങ്കിലും നീയറിയാതെ നിന്നെ ഞാൻ അറിയുന്നു ബാദുഷാ…..

ഏകാന്തതയുടെ തടവറ എന്നെ ബന്ധിയാക്കിയ നിമിഷങ്ങളിൽ ഞാൻ ഏകയായിരുന്നില്ല ബാദുഷാ, എനിക്കൊപ്പം നീയുണ്ടായിരുന്നില്ലേ? എന്നെയറിയാൻ നിനക്കായിരുന്നില്ലയെങ്കിലും….

കാറ്റ് ചെറുകിലുക്കത്തോടെ ജാലകം തള്ളി തുറക്കുമ്പോഴും ഞാൻ ഓർത്തുപോയത് നിന്നെയായിരുന്നു ബാദുഷാ,

കിനാവിലൊക്കെയും നീയായിരുന്നു

നീ നടന്ന വഴികൾ പതിയെ നമ്മുടേതാവുകയായിരുന്നില്ലേ?….

തോരാമഴയിൽ ഭ്രാന്തമായി നാം ഓടിക്കളിച്ചതോ :നിനക്കോർമ്മയില്ലേ?…..

നിന്റെ ദുഃഖം നമ്മുടെ വിരഹമായി പടരുകയായിരുന്നില്ലേ?…

നാം സ്നേഹിക്കയായിരുന്നില്ലേ ഓരോ വേർപാടിലും കൂടുതൽ അഗാധമായി?….

എങ്കിലും ബാദുഷാ ;

പിന്നെയും പല ചാന്ദ്രരാത്രികളിൽ ഞാൻ എന്നോട് തന്നെ ചോദിച്ചിരുന്നു, “ആരായിരുന്നു ഞാൻ നിനക്ക്? ” ഉത്തരം മൗനമായിരുന്നു……….